17.ágúst 2009: Stærsti laxinn sem gengið hefur í ánna í sumar er 109 cm langur og fór hann í gegnum teljarann 1.júlí sl.  Teljarinn tekur þverskurðarmynd af öllum fiski sem gengur upp laxastigann.

17.febrúar 2006: Verulegur árangur hefur náðst varðandi útrýmingu minks í Vatnsdalnum.  Frá því í september í haust hafa náðst 8 minkar í þær gildrur sem settar voru upp sl. sumar.  Þennan árangur má þakka að hinar svokölluðu minkasíur veiða stöðugt og raunar engin takmörk fyrir hve margir minkar geta veiðst í eina gildru áður en hún er tæmd.  Aldrei hafa náðst svo margir minkar á svo skömmum tíma í Vatnsdalnum.  Vitjað er um gildrurnar á 3-4 mánaða fresti og er reiknað með að þær verði næst tæmdar í lok maí eða byrjun júní.

17.júní 2005: Merking veiðistaða. Alls hafa 28 veiðistaðir verið merktir í Vatnsdalsánni.  Þar af eru 9 í neðri ánni og 19 í efri ánni.  Staðirnir eru merktir í númeraröð frá ósnum í neðri ánni til gljúfranna í efri ánni.

15.júní 2005: Minkasíur. Í allt fimm minkasíum hefur verið komið fyrir í Vatnsdalsánni.  Minkasíur eru uppfinning Reynis Bergsveinssonar tófu- og minkaveiðimanns og hafa gefist afar vel  víðsvegar um land við að halda niðri minki. Þessar síur veiða allt árið og eru því varanlegri lausn en þær sem hingað til hafa verið notaðar. Með þessum aðgerðum væntum við þess að hægt verði að útrýma minki í Vatnsdalnum og þar með að losna við einn helsta ógnvald laxa og bleikjuseiða á svæðinu.

30.apríl 2005: Nýr veiðivörður. Katla Ólafsdóttir verður veiðivörður í Vatnsdalsánni í sumar.  Katla er landvörður í friðlandinu í Vatnsfirðinum og hefur einnig tekið að sér veiðivörslu .  Veiðivörður er með aðsetur á Hótel Flókalundi og þar geta veiðimenn haft samband við hann og fengið upplýsingar um ánna og vatnið.

20.febrúar 2005: Tíðarfarið fyrir vestan hefur verið afar rysjótt í vetur og jafnvel þannig að heimamenn hafa þurft að byrgja hús og tæki svo þau fykju ekki.  Við gengum vel frá veiðihúsinu Stöng fyrir veturinn en það stendur rétt vestan við ánna Pennu við Hótel Flókalund.  Eftir eitt óveðrið fyrir jól könnuðu Einar og Bríet á Seftjörn hvernig ástandið væri að Stöng.  Einar orðaði þetta svona:

Goðin djöflast dægrin löng

duna í lofti fretin

þó að blási strítt um Stöng

stendur hún af sér hretin

20.janúar 2005 Fluga og net hefur keypt greiðslukerfi fyrir kreditkort vegna sölu á veiðileyfum.  Fyrirtækið Cardia AS í Noregi býður upp á lausnir til greiðslu með kreditkortum í gegnum netið.  Kerfið heitir Cardia Ordering og gerir það kleift að taka við greiðslum gegnum síma eða tölvupóst.  Þessi lausn mun auðvelda til muna greiðslu á veiðileyfum og auka þjónustu fyrir veiðimenn sem kaupa veiðileyfi í Vatnsdalsá og Vatnsdalsvatn.